၃၀ ကြိမ်မြောက်သာမန်တနင်္ဂနွေနေ့

သံမာကု ၁၀း၄၆-၅၂

ယနေ့ဖတ်ရှု့ရသည့် ဧ၀ံဂေလိတရားတော်တွင် ဂျေရီကိုမြို့အ၀င်တွင် ယေဇူးခရစ်တော်အား မျက်စိအလင်းပျောက်ကွယ်နေသည့် ဗာတီမေဦးဆိုသူဟာ "ဒါဝိတ်၏သား အကျွန်ုပ်ကို သနားပါ" ဟုတောက်လျှောက်ခေါ်ကာ အသနားခံနေတာကို ကြားနားကြရပါတယ်။ ထိုမျက်မမြင်၊ ဗာတီမေဦးနှင့်ခရစ်တော်တို့၏ ဆုံတွေ့ခြင်းမှာ ဗာတီမေဦး၏ယုံကြည်ခြင်းကြီးမားပုံကို တွေ့ရှိရမှာဖြစ်သည့်အပြင် ကုသပျောက်ကင်းခြင်း တန်ခိုးလက္ခဏာဟာလည်း ထိုသူ၏ယုံကြည်ခြင်းပေါ်မှာအခြေတည်၍ဖြစ်ပေါ်လာကြောင်း ထောက်ရှု့ရမှာဖြစ်ပါတယ်။

ချစ်စွာသောဓမ္မမိတ်ဆွေများ၊ ဘ၀မှာ အလင်းပျောက်ကွယ်ဖူးသလားဟု မေးခွန်းထုတ်ပါရစေ။ ကျွန်ုပ်တို့ဘ၀မှာ မျက်စိအလင်းကွယ်ပျောက်သည့် မျက်ကန်းဘ၀မရောက်ခဲ့ဘူးဆိုလျှင်ပင် ခဏတဖြုတ်အလင်းကွယ်ချိန်လေးတွေကိုတော့ မကြာခဏကြုံဖူးကြမယ်ထင်ပါတယ်။ ထိုအချိန်ဟာ ကျွန်တော်တို့အတွက် တကယ့်ကိုအမှောင်ကမ္ဘာပါပဲ။ ဒါဟာ ရုပ်ပိုင်းဆိုင်ရာအတွေ့အကြုံသာရှိပါသေးတယ်။ ၎င်းထက်ဆိုးတဲ့ စိတ်ပိုင်းဆိုင်ရာအလင်းပျောက်ကွယ်မှု့နှင့် ၀ိညာဉ်အလင်းပျောက်ကွယ်မှု့တို့တတွေလည်း ဘ၀မှာ မကြာခဏဆိုသလို ခံစားဖူးမှာပါ။ ကိုယ်တိုင်မခံစားဖူးလျှင်ပင် မိမိပတ်ဝန်းကျင်မှာ ဒုနှင့်ဒေး တွေ့ကြုံဖူးမှာပါ။ 

အလင်းဆိုတာ ကျွန်ုပ်တို့ဘ၀ရှင်သန်ရာမှာ အသက်နှင့်ထပ်တူကပ်ပါလာတဲ့ ကျေးဇူးတော်တစ်ခုပါ။ ရုပ်ပိုင်းဆိုင်ရာအတွက် အလင်းကိုရယူခံစားရှင်သန်စေရာမှာ မျက်စိနှစ်လုံးပင်ဖြစ်ပါတယ်။ ထို့အတူ ကျွန်ုပ်တို့ဘ၀ ရှင်သန်ထိုက်စေသည့်ဘ၀အလင်းကိုပေးတာကတော့ လူ့ယဉ်ကျေးမှု့ (သို့) စာရိတ္တဟု ဆိုနိုင်ပါတယ်။ ထို့အပြင် ကျွန်ုပ်တို့ခရစ်ယာန်များအတွက် ဘ၀ကို ဘ၀အတိုင်းရှင်သန်ထိုက်စေအောင် အလင်းဆောင်ပေးတာကတော့ သမ္မတရားကျမ်းတို့ပင်ဖြစ်ပါတယ်။ ထို့ကြောင့် ဆာလံကျမ်း ၁၁၉မှာ ကိုယ်တော်၏တရားတေတ်ာများသည် အကျွန်ုပ်အတွက် မီးအိမ်ပင်ဖြစ်ပါသည်ဟု တင်စားပါတယ်။ ခရစ်တော်ကိုယ်တိုင်လည်း ငါသည်သမ္မတရားဖြစ်၏၊ အလင်းလည်းဖြစ်၏ဟု အတိအလင်းမိန့်ဆိုခဲ့ပါတယ်။

အလင်းနှင့် မီးအိမ်ကိုလည်း ခရစ်တော်က ပုံဥပမာအဖြစ် သရုပ်ဖော်ပေးခဲ့ပါတယ်။ အလင်းဟာ ဘယ်လောက်ထိတန်ဖိုးကြီးပြီး အသုံးဝင်သလဲဆိုတာ လူ့သားအစဉ်အဆက် သိကြပါတယ်။ အမှောင်ထဲတွင် ရှင်သန်၍မရ၊ အလုပ် လုပ်ကိုင်၍မရ၊ ဘယ်အရာမှ မမြင်နိုင်၍ ခလုပ်ခညှောင့်တွေကိုလည်း မရှောင်နိုင်ပါဘူး။ ထိုကြောင့် လျှပ်စစ်မတည်ထွင်နိုင်ချိန် ရှေးခေတ်ကာလတွင် မီးအိမ်ဟာ လူသားတို့အတွက် အဓိကလမ်းပြ အဖြစ်အသုံးဝင်ပါတယ်။ ယနေ့ လျှပ်စစ်မရသေးသည့်နေရာများပင် ထိုအတိုင်းပါပဲ။ ထိုကြောင့် အလင်းအားဖြင့် ခရစ်တော်က ကျွန်ုပ်တို့ကို ဘုရားသခင်၏ဂုဏ်သတ္တိများ၊ ကျွန်ုပ်တို့၏ မူလဇာတိများကို မြင်နိုင်ဖို့ ညွှန်းဆိုပါတယ်။ ကိုယ်တော်၏အလင်းတော်ထဲ၌ အကျွန်ုပ်တို့သည် အလင်းကို မြင်ကြရပါ၏။ (ဆာလံ ၃၆း၉)တွင် ဆိုထားပါတယ်။ ထိုအလင်းအားဖြင့် ဘုရားသခင်၏ ပြီးပြည့်စုံခြင်း၊ အမှန်တရား၊ လှပခြင်း၊ မေတ္တာတရား၊ ကောင်းမြတ်ခြင်းနှင့် ကောင်းသောအရာအားလုံး၏ အရင်းအမြစ်တွေကို မြင်တွေ့နိုင်ပါလိမ့်မယ်။ ထိုမှတဆင့် ကျွန်ုပ်တို့တတွေဟာ အလင်းထွန်းညှိခံရသည့် မီးအိမ်များအဖြစ် အသွင်ပြောင်းကာ ကမ္ဘာကြီးကို လမ်းပြနိုင်မှာဖြစ်ပါတယ်။ 

အလင်း . . . အလင်း. . . ဘယ်လိုအလင်းမျိုးပဲဖြစ်ဖြစ် အကျွန်ုပ်တို့အတွက် မရှိမဖြစ်ကို အရေးတကြီးလိုအပ်နေသည့်အရာ၊ ကျေးဇူးတစ်ခုပါပဲ။ ကျွန်ုပ်တို့ဘ၀မှာ မည်သို့သောအလင်းမျှပျောက်ကွယ်၍ မရနိုင်ပါဘူး။ အလင်းမရှိဘဲ ရှင်သန်ရသည့်ဘ၀ဟာ ဘယ်လိုမှမဖြစ်နိုင်သည့်ဘ၀ပါပဲ။ ထို့ကြောင့် ယနေ့ဧ၀ံဂေလိကျမ်းထဲမှ မျက်စိအလင်းပျောက်ကွယ်နေသည့် ဗာတီမေဦးလိုပဲ မိမိလိုအပ်သည့်အလင်းကျေးဇူးကို ယုံကြည့်ခြင်းအပြည့်ဖြင့် ခွန်အားအပြည့်နှင့်အားယူကာ အလင်းရှင်ထံမှာ ရဲရဲဝံ့ဝံ့ ဆုတောင်းသွားကြပါစို့။

ကိုရင် (ဒိုမီနီကန်)

၂၉ကြိမ်မြောက်သာမန်တနင်္ဂနွေနေ့

သံမာကု ၁၀း၃၅-၄၅။ လူသားသည် တစ်ပါးသူ၏အစေကိုခံယူခြင်းငှာမဟုတ်ဘဲ အစေခံခြင်းငှာ ကြွလာ၏။

ယခုတလော မြန်မာပြည်မှာ ရွေးကောက်ပွဲနီးလာသည်နှင့်အမျှ ပါတီအမျိုးမျိုးမှ ကိုယ်စားလှယ်အမျိုးမျိုးဟာ နိုင်ငံတော်ကို ဦးဆောင်ရတဲ့နေရာတစ်ခုခု၊ လွှတ်တော်ထဲမှ နေရာတစ်ခုခု၊ သမ္မတဆိုတဲ့ နိုင်ငံခေါင်းဆောင်ကြီးနေရာအတွက် စသဖြင့် မဲဆွယ်နေကြတာ ကျွန်ုပ်တို့တွေ သိမြင်၊ ကြုံတွေ့နေကြရပါတယ်။

ထို့အတူ ယနေ့သံမာကု၏ ဧ၀ံဂေလိတရားတော်ကလည်း အကျွန်ုပ်တို့အတွက် စဉ်းစားထောက်ရှု့စရာအချို့ကို သိသိသာသာကြီး မြင်သာနေပါတယ်။ မိမိကိုယ်ကို ခေါင်းဆောင်နေရာမှာ ရှိနေစေချင်သလား၊ ဒါမှာဟုတ် နောက်လိုက်နေရာမှာပဲ ရှိနေစေချင်ပါသလား။ မိမိကိုယ်ကို ပထမဆိုတဲ့ ဦးစားပေးခံရသည့်နေရာရှိနေစေချင်သလား၊ ဒါမှာမဟုတ် အနောက်၊ နောက်ဆုံးနေရာမှာပဲ တင်းတိမ်နေချင်ပါသလား။ လူ့ဘောင်အဖွဲ့အစည်းအတွင်း၊ မိမိအသိုင်းအ၀ိုင်းအတွင်းမှာ မိမိဟာ အရေးပါအရာရောက်သည့် တစ်စုံတစ်ဦးဖြစ်နေချင်သလား၊ ဒါမှမဟုတ် ဘာပဲဖြစ်နေဖြစ်နေပါစေဆိုပြီး တင်းတိမ်ကျေနပ်နေပါသလား။

ယနေ့ဧ၀ံဂေလိတရားတော်ထဲမှာတော့  ညီအစ်ကိုနှစ်ယောက်ဖြစ်ကြသည့် ယာကုပ်နှင့်ယောဟန်တို့ကတော့ ခရစ်တော်သခင်နားကပ်၍ ဆရာသခင်၏ဘုန်းဂုဏ်တော်မှာ လက်ယာတစ်ယောက်၊ လက်ဝဲတစ်ဦး စသည့်နေရာတွေကို  ပေါ်ပေါ်တင်တင် ရဲရဲဝံ့ဝံ့တောင်းဆိုလိုက်ပါတယ်။ ထိုညီအစ်ကိုနှစ်ယောက် သိပ်ပြီး လောကသားတွေဆန်နေသလား။ ဤသို့ဆိုလျှင် လောကသားဆန်တယ်ဆိုတာ ဂုဏ်ဒြပ်လေးတွေနဲ့ အထင်ကြီးလေးစားခံချင်လိုတဲ့ဗီဇလေးတွေ ပါနေတာကို မီးမောင်းထိုးပြနေပါတယ်။ ခေါင်းဆောင်နေရာကြီး မလိုချင်ပါဘူးဆိုလျှင်ပင် လေးစားသမှု့လေးတော့ ခံချင်ကြပါသေးတယ်။ ပထမနေရာမှာ မနေရလည်း ကိစ္စမရှိပါဘူးဆိုလျှင်ပင် အရေးပေးဆက်ဆံတာလေးတွေ ခံချင်ကြပါသေးတယ်။ မိမိအသိုင်းအ၀ိုင်း လူ့ဘောင်အဖွဲ့အစည်းထဲမှာ ဟိုသူလို ဒီသူလို အရေးပါအရာရောက်တဲ့ မဖြစ်လည်း ဘာဖြစ်လဲဆိုလျှင်ပင် တစ်စုံတစ်ယောက်တော့ ဖြစ်ချင်ကြပါသေးတယ်။ ဒီတော့ မိမိတို့ဘ၀မှာ နေရာတစ်နေရာလောက် မက်မောတတ်ကြတာ မှားယွင်းတဲ့ဆန္ဒမဟုတ်ပါဘူး။ သို့သော်လည်း ထိုနေရာတစ်နေရာအတွက်တော့ မိမိတို့ဟာ ထိုက်တန်တဲ့သူတွေဖြစ်ဖို့လိုပါတယ်။

သမ္မတဖြစ်လိုတဲ့သူဟာ သမ္မတဖြစ်ထိုက်ဖို့လိုပါတယ်။ လွှတ်တော်ထဲက နေရာတစ်ခုခုကို လိုချင်တဲ့သူဟာလည်း ထိုနေရာအတွက် ထိုက်တန်ဖို့လိုပါတယ်။ ၀န်ကြီးဖြစ်လိုတဲ့သူကလည်း ၀န်ကြီးဖြစ်ထိုက်ဖို့လိုပါတယ်။ ကျွန်ုပ်တို့ရပ်ရွာတွေမှာလည်း ဥက္ကဌဖြစ်လိုသူဟာ ဥက္ကဌဖြစ်ထိုက်ဖို့လိုပါတယ်။ သာသနာ့အရေးမှာ ဦးဆောင်တဲ့သူဟာလည်း သာသနာ့ဦးသျှောင်ဖြစ်ထိုက်ဖို့လိုပါတယ်။ ရဟန်းဖြစ်လိုသူ ရဟန်းဖြစ်ထိုက်ဖို့လိုပါတယ်။ မိမိကိုယ်ကို ဘယ်လိုနေရာမှာပဲ ရှိစေချင်၊ရှိစေချင် - ထိုဆန္ဒတွေအတွက် မမှားပါဘူး သို့သော်လည်း ထိုနေရာမှာတော့ ရှိထိုက်ဖို့လိုပါတယ်။

ဒီတော့ ထိုနေရာတွေအတွက် ဖြစ်ထိုက်သူ၊ ရှိထိုက်သူဆိုတာ ဘယ်လိုအရည်ချင်းတွေ၊ ဘယ်လိုစိတ်ထားတွေ၊ ဘယ်လိုသဘောထားတွေလိုအပ်ပါသလဲ။

ရာထူးရာခံတောင်းခံခဲ့ကြသည့် ညီအစ်ကိုနှစ်ဦးကို ခရစ်တော်သခင်က အပြစ်မတင်ခဲ့ပါဘူး။ သို့သော်လည်း သူတို့၏ဆန္ဒတွေအတွက် သူတို့တတွေဖြည့်ဆည်းနိုင်ဖို့ စိန်ခေါ်လိုက်ပါတယ် - ငါသောက်လတ္တံ့သော ခွက်ကို သင်တို့သောက်နိုင်ကြသလား။ ငါခံယူတဲ့ဆေးကြော်ခြင်းကို သင်တို့ခံယူနိုင်ကြပါ့မလား။ ဆိုလိုသည်မှာ- ထိုရာထူးရာခံတွေအတွက်၊ နေရာအတွက် ဘုန်းတန်ခိုးတက်ချိန်သာမဟုတ်ဘဲ ဒုက္ခဝေဒနာတွေ၊ ပေးဆပ်အနစ်နာမှု့တွေလည်း ခံနိုင်ကြပါ့မလားဟု မေးမြန်းစိန်ခေါ်လိုက်ခြင်းဖြစ်ပါတယ်။ သို့သည့်တိုင်အောင် ထိုရာထူးရာခံနှင့်နေရာအတွက်က မသေချာသေးကြောင်း ခံယူနိုင်ဖို့ပြင်ဆင်ထားစေပါတယ်။ အကောင်းဆုံးသော ပြင်ဆင်နည်းဟာ မိမိဟာ တစ်ပါးသူ၏အစေကိုခံယူခြင်းမဟုတ်ဘဲ အစေခံနေတတ်ဖို့ လိုအပ်ပါတယ်။ ဒါဟာ အထက်ဖော်ပြပါနေရာ၊ ရာထူးရာခံတွေမှာ ရှိထိုက်၊ဖြစ်ထိုက်သူများ၏ အဓိက ပိုင်ဆိုင်ရမည့် စိတ်နေသဘောထားပင် ဖြစ်ပါတယ်။ ထို့နောက်မှ တတ်အပ်သည့်ပညာအရည်အချင်းများ ပေါင်းဖြည့်ရပါမယ်။

ခရစ်တော်၏နောက်လိုက်ကောင်းများဖြစ်သည့်အလျောက် ကျွန်ုပ်တို့တတွေလည်း မိမိတို့ဆရာသခင်နည်းတူ တစ်ပါးသူ၏အစေကိုခံယူခြင်းမဟုတ်ဘဲ အစေခံခြင်းပြုနိုင်ဖို့သည်သာ အဓိကဟူသော စိတ်သဘောထားများဖြင့် ကောင်းကင်နိုင်ငံရှိ ထာဝရဘုန်းဂုဏ်တော်နေရာတစ်ခုအတွက် မျှော်ကိုးရင်း ရှင်သန်သွားကြပါစို့။

ကိုရင် (ဒိုမီနီကန်)

ဘာစီလီကာ၊ ကက်သီဒြရယ်နှင့် ဘုရားရှိခိုးကျောင်းများ

ခရစ်ယာန်ဘာသာတရားနှင့် ကိုးကွယ်ရာဗိသုကာအဆောက်အအုံတွေကို ရောက်ဖူးကြမှာပါ။ ဤကိုးကွယ်ရာဗိသုကာအဆောက်အအုံများဟာလည်း ကမ္ဘာတ၀ှမ်းလုံး နေရာအနှံ့မှာ ပုံစံမျိုးစုံနှင့် ထွန်းကားလာခဲ့ကြသည့်အတွက် များသောအားဖြင့် ဘုရားရှိခိုးကျောင်းအဖြစ်သာ ဗဟုသုတရှိနေကြပါတယ်။ ခရစ်ယာန်တွေရဲ့ဝတ်ပြုကိုးကွယ်ရာ အဆောက်အအုံတစ်ခုထဲကို ၀င်လိုက်တာနဲ့ ဘုရားရှိခိုးကျောင်းဆို (church) ဆိုတာ လူတိုင်းလိုလိုသိကြပါတယ်။ သို့သော်လည်း သမိုင်းအစဉ်လာနှင့်ရပ်တည်လာခဲ့ကြသည့် ကက်သလစ်အသင်းတော်နှင့် အော့သိုဒေါ့စ်ဘုရားကျောင်းကြီးတွေရဲ့ ကွာခြားမှု့လေးတွေကိုတော့ ခွဲခြားနိုင်သည့် ဗဟုသုတနဲနေကြပါလိမ့်မယ်။ ကျွန်ုပ်တို့ကက်သလစ်အသင်းတော်အတွင်းရှိ ဘုရားရှိခိုးကျောင်းများကို ဘာစီလီကာ၊ ကက်သီဒြရယ်နှင့် ဘုရားရှိခိုးကျောင်းအဖြစ် ကွာခြားတာလေးတွေကို ဗဟုသုတအဖြစ် ဝေမျှလိုပါတယ်။

ပထမဦးဆုံး ဘာစီလီကာအကြောင်းကို မသွားခင်၊ ကက်သီဒြရယ်အကြောင်းကနေစရင် ပိုပြီးရှင်းပါလိမ့်မယ်။ ကက်သလစ်အသင်းတော်အတွင်းမှာ Diocese ဆိုတဲ့ သာသနာနယ်များခွဲခြားပြီး စီမံအုပ်ချုပ်ပါတယ်။ ထိုသာသနာနယ်တစ်ခုဆီတိုင်းမှာ ဆရာတော်တစ်ပါး (လိုအပ်လျှင် လက်ထောက်ဆရာတော်များ)သာအုပ်ချုပ်ဦးဆောင်ပြီး ရဟန်းတော်များအားဖြင့် parish သာသနာစုလေးတွေကို ဦးစီးဦးဆောင်မှု့ပြုပါတယ်။ ပုံမှန်အားဖြင့် သာသနာနယ်တစ်ခုမှာ ဆရာတော်တစ်ပါးသာရှိသည့်အတွက် ဆရာတော်ကျောင်းထိုင်သည့်နေရာ၊ သာသနာတစ်ခုဆီ၏ဗဟိုဘုရားရှိခိုးကျောင်းကြီးကို ကက်သီဒြရယ်ကြီးဟု ခေါ်ပါတယ်။ ထိုကြောင့် သာသနာနယ်တစ်ခုဆီမှာ ကက်သီဒြရယ်ကြီး တစ်ခုသာရှိပြီး ကျန်သည့်ကိုးကွယ်ရာကျောင်းတော်ကြီးတွေကတော့ ဘုရားရှိခိုးကျောင်းများဖြစ်ပါတယ်။ မှတ်သားစရာကတော့ သာသနာနယ်တစ်ခုဆီအတွင်းမှာရှိတဲ့ ဘုရားရှိခိုးကျောင်းများထဲမှာမှ ဆရာတော်ကြီးကျောင်းထိုင်သည့်၊ သာသနာ့ဗဟိုဘုရားရှိခိုးကျောင်းကို ကက်သီဒြရယ်ဟု ခေါ်ဆိုပါတယ်။ ထိုကက်သီဒြရယ်ဟာ ကြီးမားသည့်ကျောင်းတော်ဖြစ်လျှင်မှဖြစ်မည်၊ ခမ်းနားထည်ဝါဆုံးဖြစ်လျှင်မှဖြစ်မည် - အဓိကမကျပါဘူး။ ကက်သီဒြရယ်ဆိုသည့် ဝေါဟာရဟာ လာတင်ဘာသာစကားမှလာပြီး ထိုင်ခုံဟု အကြမ်းအားဖြင့်အဓိပ္ပာယ်ရပြီး သမိုင်းမှာ ဆရာတော်လိုသွန်သင်အုပ်ထိန်းသူသာလျှင် ထိုင်ခုံဖြင့်ထိုင်ပြီး ကျန်သည့်တရားနာအားလုံးဟာ မတ်တတ်ရပ်၍ တရားနာရသည့်အတွက်ကြောင့် ကက်သီဒြရယ်ဆိုတာ ဆရာတော်ထိုင်သည့်ကျောင်းတော်ကြီးဟု အဓိပ္ပာယ်ရပါတယ်။

ဘာစီလီကာဆိုတာကတော့ အဓိပ္ပာယ်ဖွင့်ရခက်ပါတယ်။ ဗိသုကာအနေဖြင့်တော့ ဘာစီလီကာဆိုတာ ရောမအင်ပါရာဗိသုကာအမွေဖြစ်ပါတယ်။ ရောမခေတ်ကာလအတွင်းကတည်းက ဘာစီလီကာကြီးတွေကို အင်ပါရာမင်းမြတ်တွေ ဆောက်လုပ်နေထိုင်ခဲ့ကြပါတယ်။ ပြောရမယ်ဆိုလျှင်တော့ ဘာစီလီကာဆိုတာ အင်ပါရာမင်းတွေရဲ့ နန်းသုံး ကြီးကျယ်ခမ်းနားသည့် ခမ်းမဆောင်ကြီးပါ။ အလွန်တရာကြီးမားပြီး အချိုးစားကျကျနှင့် တခမ်းတနားတည်ဆောက်ထားသည့် သွားလမ်းသုံးလမ်းပါပြီး မျက်နှာကျက်မြင့်မားသည့် ခမ်းမဆောင်ကြီးပင် ဖြစ်ပါတယ်။

လေးရာစုမှာတော့ ရောမအင်ပါရာ ကွန်စတန်တီနိုမှ ခရစ်ယာန်ဘာသာတရားကို ညှင်းပမ်းနှိပ်စက်ခြင်းရပ်တန့်ကာ တရားဝင်ဝတ်ပြုကိုးကွယ်စေခဲ့ပြီးနောက်မှာတော့ ထိုအင်ပါရာမင်း၏မျက်နှာသာပေးမှု့နှင့်အတူ ခရစ်ယာန်ဆရာတော်ကြီးများက ဘုရားရှိခိုးကျောင်းတော်ကြီးအချို့ကို ထိုဘာစီလီကာများအား အတုယူကာ တည်ဆောက်လာခဲ့ကြပါတယ်။ အထူးသဖြင့် အထူးသဒ္ဓါကြည်ညိုထိုက်သည့်နေရာများ၊ သာသနာ၏အထူးဂုဏ်ပြုထိုက်သည့် ရဟန္ဓာကြီးများ၏ နေရာများကို ဘာစီလီကာအဖြစ်ဆောက်လုပ်ကာ ဂုဏ်ပြုလျက်ရျိပါတယ်။ ထို့ကြောင့် ဘုရားဖူးနေရာများတွင် ခရစ်တော်၊ မယ်တော်မာရိယာမှအစ ရဟန္ဓာသူတော်စင်ကြီးများ၏ အသုံးအဆောင်တစ်ခုခု၊ Relic (ပဌနာ)တစ်ခုခု ထားရှိပြီး ပုပ်ရဟန်းမင်းကြီးမှ ဘာစီလီကာကြီး၊ ဘာစီလီကာငယ် စသဖြင့် ခေါင်းစီးတပ်ပေးပါတယ်။ ထို့အတူ ပြင်သစ်ပြည်မှ လုဒ်မြို့လို၊ ပေါ်တူဂီမှ ဖာတီမာရွာလို တန်ခိုးတော်များဖြစ်ပေါ်ရာနေရာတွေမှာလည်း ဘာစီလီကာများဆောက်လုပ်ကာ အထူးသဒ္ဓါကြည်ညိုမှု့များပေးစေပါတယ်။ ထို့နောက် Shrine ဟူ၍ ဘုရားဖူးနေရာအဖြစ်လည်း ၎င်း၏စံချိန်စံနှုန်းများမှီသောအခါ ပုပ်ရဟန်းမင်းကြီးမှ တရားဝင်သတ်မှတ်ကြေငြာပေးပါတယ်။ သို့သော်လည်း ကမ္ဘာနှင့်ချီ၍ တန်ခိုးတော်များဖြစ်ပေါ်နေသည့်အတွက် အချို့နေရာတွေမှာ ဒေသခံတွေသာသိတဲ့ ဘုရားဖူးနေရာတွေလည်း အများကြီးရှိနေပါတယ်။

ကမ္ဘာတ၀ှမ်းလုံးမှာ ဘာစီလီကာငယ်ပေါင်း ၁၄၀၀ကျော်ရှိပြီး ၎င်းတို့ထဲမှ ၅၂၇ ဘာစီလီကာငယ်ဟာ အီတလီတနိုင်ငံတည်းမှာပင် ရှိနေပါတယ်။

မနောအောင်

၂၇ကြိမ်မြောက်သာမန်တနင်္ဂနွေနေ့

သံမာကု ၁၀း၁၇-၃၀

ကောင်းမြတ်သောဆရာသခင် ထာဝရအသက်ကိုရရှိရန် အကျွန်ုပ်သည် မည်သည့်အရာကို ပြုရပါမည်နည်း

ယနေ့ဧ၀ံဂေလိတရားတော်တွင် အစစအရာရာပြီးပြည့်စုံသည်ဟု ယူဆရသည့် သူဌေးလေးတစ်ဦးဟာ ခရစ်တော်သခင်အားမြင်တွေ့၍ အမှန်တကယ် ထာဝရအသက်ကိုပိုင်ဆိုင်ဖို့ မိမိတွင် လုပ်စရာတစ်ခုခုလိုအပ်နေသေးသည်ဟု ခံစားမိ၍ ခရစ်တော်ထံချည်းကပ်ပြီး မည်သည့်အရာကို ပြုရမည်နည်းဟု မေးလျှောက်ပါတယ်။

တကယ်တော့ ထိုသူဌေးလေးဟာ လောကမှာဖြောင့်မတ်ရိုးသားလှသူ တစ်ဦးဖြစ်ပါတယ်။ သူဟာ မိုးဇယ်ပေးထားသည့် တရားကျမ်းများကို တသွေမတိမ်းဖြည့်ဆည်းကာ ပညတ်တော်ဆယ်ပါးကိုလည်း လုံးဝစောင့်ထိန်းသူဖြစ်ကြောင်း ဖော်ပြထားပါတယ်။ ထိုကြောင့်သူဟာ လိမ်မာယဉ်ကျေး၍ တရားနှင့်ပြည့်စုံသော မိသားစုမှမွေးဖွားလာသူတစ်ဦးဖြစ်ကြောင်း ကောက်ချက်ချနိုင်ပါတယ်။ သို့သော်လည်း ထာဝရအသက်ကို ရရှိပိုင်ဆိုင်ဖို့ သူ့မှာ တစ်ခုခုလစ်ဟာနေတုန်းပါပဲ။

ထိုအလစ်ဟာနေသည့်အရာဟာ မျှဝေတတ်ခြင်းပါရမီပါပဲ။ သူဌေးလေးမှာ မျှဝေတတ်ခြင်းပါရမီပျောက်ကွယ်ေ်နပါတယ်။ ဒီပါရမီဟာ ခရစ်တော်၏ဗဟိုရ်တရားဖြစ်ပြီး ကျွန်ုပ်တို့ခရစ်ယာန်တိုင်းဟာ ရရှိလာတဲ့ကျေးဇူးတော်တွေကို မျှဝေအသုံးချကြရမှာ ဖြစ်ပါတယ်။ ဒီနေ့တရားတော်ထဲက သူဌေးလေး၏ ချမ်းသာကြွယ်ဝမှု့တွေဟာ တကယ်တော်ကျေးဇူးတော်တွေပါပဲ။ သို့သော်လည်း ထိုကျေးဇူးတော်တွေကို မျှဝေတတ်ခြင်း၊ လိုအပ်နေသူတွေကို ပေးကမ်းစွန့်ကြဲခြင်းဆိုတဲ့ ပါရမီသူ့မှာပျောက်ကင်းနေပါတယ်။ သူဟာ ကျေးဇူးတော်တွေကို ကျေးဇူးတော်ဖြင့် မမြင်ဘဲ လောကတတ်မက်စရာစည်းစိမ်ဥစ္စာအဖြစ် တွယ်တာလွန်းသောကြောင့် မျှဝေတတ်ခြင်းပါရမီကို မကျင့်ဆောက်တည်နိုင်ခဲ့ဘူး ဖြစ်နေပါတယ်။

ချစ်စွာသော မိတ်ဆွေများခင်ဗျာ- အကျွန်ုပ်တို့တစ်ဦးချင်းစီတိုင်းမှာလည်း မတူညီတဲ့ ကျေးဇူးတော်တွေကို ဘုရားသခင်က အစဉ်သွန်းလောင်းပေးနေပါတယ်။ တချို့ဟာ ချမ်းသာကြွယ်ဝခြင်းကျေးဇူးတော်၊ တချို့ဟာ ပညာပါရမီပြည့်စုံခြင်းကျေးဇူးတော်၊ တချို့ဟာ အတတ်ပညာအမျိုးမျိုးကျေးဇူးတော်၊ ခေါင်းဆောင်နိုင်စွမ်းကျေးဇူးတော်၊ ဟာသညဏ်၊ ရသအမျိုးမျိုးပေးနိုင်သော ပါရမီကျေးဇူးတော် စသဖြင့် များစွာသောကျေးဇူးတော်များဟာ အကျွန်ုပ်တို့တစ်ဦးချင်းစီတိုင်းမှာ မတူညီတဲ့ပုံစံမျိုးစုံနဲ့ အမျိုးမျိုးပေးသနားခံရပါတယ်။ သို့သော်လည်း ထိုကျေးဇူးတော်တွေကို ဝေမျှတတ်သည့်ပါရမီကို အကျွန်ုပ်တို့တတွေ ဆောက်တည်နိုင်ပြီလား။ ဒါမှမဟုတ် ထိုကျေးဇူးတော်တွေကို မိမိအတွက်သာလျှင်ဆိုတဲ့ အတ္တစိတ်တတ်မက်ကာ တကိုယ်ကောင်းဆန်ဆန်သိမ်းဆည်းထားသလား - စဉ်းစားထောက်ရှု့သွားကြပါစို့။

ကိုရင် (ဒိုမီနီကန်)

ပြည်သူ့ဆန္ဒမဲနှင့် လွတ်လပ်၍တရားမျှတသော ရွေးကောက်ပွဲအတွက် ပန်ကြားနှိုးဆော်လွှာ

နှစ်ပေါင်း ၆၀ ကျော်နေ၀င်ခဲ့ရပြီး အမှောင်ထုတစ်ခု၏ဖုံးလွှမ်းမှု့ကို ခံခဲ့ရသော မြန်မာနိုင်ငံတော်ကြီးနှင့်အတူ ၎င်းအတွင်းမှီတင်းနေထိုင်ကြသည့် လူမျိုးစု၊တိုင်းရင်းသားနွယ်အပေါင်းတို့ဟာ အလင်းရောင်ကို အလွန်ဆာလောင်နေကြပါတယ်။

လွန်ခဲ့သော ငါးနှစ်မှာ အလင်းတန်းမှိန်မှိန်တစ်ခုကို အကျွန်ုပ်တို့တတွေမြင်တွေ့ခဲ့ရပြီ။ ထို့ကြောင့် နိုင်ငံတော်နှင့်မှီတင်းနေထိုင်သူအားလုံးအတွက် မျှော်လင့်ချက်တို့တဖန်မွေးခဲ့ပါပြီ။ သို့သော်လည်း ထိုမျှော်လင့်ချက်ကို အကောင်ထည်ဖော်နိုင်ဖို့တော့ အကျွန်ုပ်တို့တစ်ဦးချင်းစီ မပါမနေ၊ မဖြစ်မနေ ပါဝင်လှုပ်ရှားကြရပါလိမ့်မယ်။ ထိုအခွင့်အရေးသည်ပင် လူတစ်ဦး၏ အခြေခံအခွင့်အရေးပါ။ ဒီမိုကရေစီမှာ ပြည်သူပြည်သားတစ်ဦးချင်းစီ၏ မဲဆန္ဒတွေဟာ အလွန်တန်ဖိုးကြီးလှပါတယ်။ ထို့ကြောင့် ကြားနေ၍ မဖြစ်ပါ။ မဲပေးကို ပဲရပါမယ်။ အသက်ပြည့်သူတိုင်း မဲပေးပိုင်ခွင့်ရှိကို ရှိရပါမယ်။ မဲပေးဖို့ဟာ ပြည်သူ ပြည်သား တစ်ဦးချင်းစီ၏ နိုင်ငံ့တာဝန်ပါပဲ။ ဒါကြောင့် မိမိတို့၏မျိုးချစ်စိတ်တွေကို ဤနေရာမှာ အကောင်းဆုံးအသုံးချလိုက်ကြပါ။

ပါတီစုံဒီမိုကရေစီစနစ်ကိုကျင့်သုံးတဲ့ ယခုလိုနိုင်ငံမှာ ပါတီပေါင်းများစွာရှိနေတာ မဆန်းပါဘူး။ ဒီလို မတူညီကွဲပြားတဲ့ ပါတီတွေရှိနေတာဟာ နိုင်ငံတော်ကို အကျည်းမတန်စေပါဘူး - တကယ်တော့ အရောင်စုံပြီး ပို၍တင့်တယ်စေပါတယ်။ ပါတီအမျိုးမျိုးမှ အရည်အချင်းမျိုးစုံနှင့်အမတ်လောင်များလည်း နိုင်ငံတော်ကြီး၏အိပ်မက်တွေ၊ မျှော်လင့်ချက်တွေကို အကောင်ထည်ဖော်ဖို့အတွက် ရရာတာဝန်ထမ်းဆောင်ကြမယ်ဆိုတဲ့ ၎င်းတို့၏ဆန္ဒတွေကို ထုတ်ဖော်ပြသနေကြပါတယ်။ ထိုသို့ပင်ဆိုစေသော်လည်း ပြည်သူတွေအတွက်တော့ မှန်မှန်ကန်ကန်နှင့် အသင့်တော်ဆုံး အမတ်လောင်းကို  မဲပေးရွေးချယ်နိုင်စွမ်းရည်ရှိဖို့တော့ ပို၍လိုအပ်လာပါပြီ။

နှစ်ပေါင်း ၆၀ကျော် အလင်းပျောက်နေတဲ့ နိုင်ငံတော်ကြီးမှာ အနာအဆာ ဒဏ်ရာပေါင်းများစွာဖြင့် ဖြတ်သန်းလာခဲ့ရပါတယ်။ ဒီဒဏ်ရာတွေကို ကုစားပေးဖို့ နိုင်ငံသားတိုင်းမှာ တာဝန်ရှိပါတယ်။ ထို့ကြောင့် မိမိတို့တတွေဟာ မဲဆန္ဒပေးတော့မည်ဆိုလျှင် တနိုင်ငံလုံးအတိုင်းအတာဖြင့်ကြည့်၍ အမြင်ကျယ်ကျယ်ဖြင့် မဲပေးနိုင်စွမ်းရှိဖို့လိုပါလိမ့်မယ်။ ဒီအချိန်ဟာ နိုင်ငံတော်ကြီးကို ကုစားနေရသည့်အချိန်ဆိုတာ မမေ့ကြပါနှင့်။

ထို့ကြောင့် မိမိတို့တတွေအနေဖြင့် မဲပေးတော့မည်ဆိုလျှင် -

၁။ မြန်မာပြည်အတွင်း ကာလကြာရှည်ဖြစ်ပွားနေသည့် တိုင်းရင်းသားပဋိပက္ခနှင့် စစ်ပွဲများကို အဆုံးသပ်နိုင်စွမ်းရှိသည့် ပါတီနှင့်၎င်းပါတီဝင်များ

၂။ တကွဲတပြားဖြစ်နေသော နိုင်ငံတော်၏တိုင်းရင်းသားမျိုးနွယ်စုများအား ပြည်ထောင်စုကြီးအဖြစ် စစ်မှန်သည့် စည်းလုံးညီညွှတ်ခြင်းနှင့် အားလုံးတန်းတူအခွင့်အရေးရရှိအောင် ပြုလုပ်ပေးနိုင်စွမ်းရှိသည့် ပါတီနှင့် ၎င်းပါတီဝင်များ

၃။ မြန်မာနိုင်ငံအတွင်းရှိ နိုင်ငံသားတိုင်း၏ လူနေမှု့ဘ၀ကို အမှန်တကယ်မြှင့်တင်ပေးနိုင်မည့် ပညာရေး၊ စီးပွားရေး၊နှင့် လူ့အခွင့်အရေးများကို ဖော်ဆောင်ပေးနိုင်မည့် ပါတီနှင့် ၎င်းပါတီဝင်များ

၎။ နိုင်ငံတော်အတွင်းရှိ သဘာဝသံယဇာတများကို နိုင်ငံအကျိုးပြုနှင့် ပြည်သူပြည်သားများလည်း မျှဝေခံစားခွင့်ရှိအောင် အခြားနိုင်ငံများနှင့်လက်တွဲလုပ်ဆောင်သည့်တိုင်အောင် မိမိတို့၏နိုင်ငံသားတိုင်း၏ အခြေခံအခွင့်အရေးများကို ကာကွယ်ပေးနိုင်ပြီး နိုင်ငံတော်၏သဘာဝအရင်းအမြစ်တွေကို နည်းစနစ်ကျကျအသုံးပြု၍ ကာကွယ်စောင့်ရှောက်နိုင်စွမ်းရှိသည့် ပါတီနှင့် ၎င်းပါတီဝင်များ

၅။ မြန်မာနိုင်ငံသူ၊ နိုင်ငံသားတိုင်းနှင့် တစ်ထပ်တည်းကျပြီး နိုင်ငံတော်အား စစ်မှန်သည့် စနစ်ကောင်းများဆီသို့ ခေါ်ဆောင်သွားနိုင်သည့် ပါတီနှင့် ၎င်းပါတီဝင်များကို စီစစ်ရွေးချယ်ပြီး မဲပေးနိုင်ကြရပါမယ်။ သို့မှသာလျှင် ကျွန်ုပ်တို့သည်လည်း နိုင်ငံပေးတာဝန်ကို တာဝန်ကျေပွန်စွာ ဖြည့်ဆည်းရာရောက်ပါလိမ့်မယ်။

အကျွန်ုပ်သည် ကက်သလစ်ခရစ်ယာန်ရဟန်းလောင်းဖြစ်သည့်အလျောက် ပါတီနိုင်ငံရေးအား လုပ်ဆောင်ခြင်းမပြုသည့်အတွက် ဘယ်ပါတီကို မဲပေးပါ၊ ဘယ်ပါတီကို ကန့်ကွက်ပါဟူ၍ မဟောပြောပါ။ သို့သော်လည်း နိုင်ငံသားတစ်ဦးဖြစ်သည့်အလျောက်၊ တရားတော်၏သားတော်ဖြစ်သည့်အလျောက် အမျိုးသားနိုင်ငံရေးအရ နိုင်ငံတော်ကို အမှန်တကယ်ငြိမ်းချမ်းစေရန်နှင့် ဘယ်စုံဖွံ့ဖြိုးတိုးတက်စေဖို့ ယေဇူးခရစ်တော်၏မေတ္တာတရား၊ ငြိမ်းချမ်းခြင်းတရားနှင့် တရားမျှခြင်းတရားတို့ကို လက်ကိုင်ထား၍ ယခုလို နိုးဆော်လိုက်ရခြင်းသာ ဖြစ်ပါတယ်။

ဆုတောင်းမေတ္တာ။

တရားမျှတခြင်း၊ မေတ္တာတရားနှင့် အားလုံးစုံကို တတ်နိုင်သောမူသော အိုအဖဘုရားသခင်၊ တပည့်တော်တို့၏နိုင်ငံတော်ကြီးကို ကောင်းကြီးပေးသနားတော်မူပါ။ နိုင်ငံတော်အတွင်းရှိ အုပ်ချုပ်ဦးဆောင်နေသူများကိုကောင်းကြီးပေးတော်မူပါ။ ပြည်သူပြည်သား တစ်ဦးချင်းစီကိုလည်း ကောင်းကြီးပေးတော်မူပါ။ မကြာမှီကျင်းပပြုလုပ်မည့် အထွေထွေရွေးကောက်ပွဲမှာလည်း ကိုယ်တော်ရှင်အစ၊အလယ်၊ အဆုံးထိတိုင်အောင် ပါဝင်ပြီး ငြိမ်းချမ်းစွာ ကျင်းပပြုလုပ်နိုင်စေဖို့ ကောင်းကြီးပေးတော်မူပါ။ ရွေးကောက်ပွဲကြီးကိုလည်း လွတ်လပ်၍ တရားမျှတသော ရွေးကောက်ပွဲကြီးဖြစ်စေတော်မူပါ။ မဲပေးခွင့်ရှိသူတိုင်း မဲပေးနိုင်ကြပြီး မဲပေးကြသူတိုင်းလည်း မှန်ကန်လွတ်လပ်စွာ မဲပေးနိုင်ကြစေတော်မူပါ။ အခုရွေးကောက်ပွဲကြီးမှ မြန်မာနိုင်ငံတော်အတွက် ငြိမ်းချမ်းရေးနှင့် ဘက်စုံတိုးတက်မှု့ရှိရန် ဦးဆောင်ဦးရွက်ပြုနိုင်သော အစိုးရဖွဲ့ကို ရွေးကောက်နိုင်စေပါမည့်အကြောင်း ကိုယ်တော်ရှင်၏တစ်ပါးတည်းသော သားတော်ယေဇူးခရစ်တော်ကို အမှီပြု၍တောင်းလျှောက်ကြပါသည်။ အာမင်။

ကိုရင် (ဒိုမီနီကန်)

၂၇ ကြိမ်မြောက်သာမန်တနင်္ဂနွေနေ့

"ဘုရားသခင်ဖက်စပ်တော်မူသောအရာကို လူသည်မခွဲခွာစေနှင့်။"

သာမန်အားဖြင့်ကြည့်မယ်ဆိုလျှင် ယနေ့ဖတ်ရှု့ရသည့်ဧ၀ံဂေလိတရားတော်မှာ လက်ထပ်ထိမ်းမြှားခြင်းအကြောင်း ထောက်ပြသွန်သင်ထားခြင်းဖြစ်ပါတယ်။ သို့သော်လည်း ယနေ့တရားတော်ဟာ လက်ထပ်ထိမ်းမြှားခြင်းဆိုင်ရာသွန်သင်ချက်ထက် ပို၍နက်ရှိုင်းပါတယ်။

ယနေ့ဧ၀ံဂေလိတရားတော်အား ဖတ်ရှု့မိသောအခါ ဥပဒေနှင့် တရားတော်ဟူ၍ ကွဲပြားခြားနားစွာတွေ့နိုင်ပါတယ်။ ပထမ ဥပဒေဆိုသည်မှာ လူတစ်ဦးတစ်ယောက်အား အကန့်အသပ်တစ်ခုထိသာ ဖြောင့်မတ်စေပါတယ်။ သို့သော်လည်း တရားတော်မူကား လူတစ်ဦးတစ်၏ ဖြောင့်မတ်ခြင်းအား ပြီးပြည့်စုံစေပါတယ်။ ထို့ကြောင့်လည်း ခရစ်တော်သခင်အား ဖာရီဇေဦးတို့က အကောက်ကြံ၍ လင်မယားကွာရှင်းအပ်သလောဟု မေးမြန်းကြရာတွင်ခရစ်တော်က ပထမ မိုးဇယ်၏ဥပဒေကို ထောက်ပြခဲ့ပါတယ်။ ထို့နောက်မှ တရားတော်ကို ညွှန်ပြခဲ့ပါတယ်။

မိုးဇယ်၏ဥပဒေမှာ လင်ယောက်ျားဖြစ်သူမှ အစပြု၍ ဖြတ်စာရေးကာ မိမိမယားအား ကွာရှင်းခွင့်ပြုပါတယ်။ ထို့ကြောင့် ဥပဒေအရကြည့်လျှင် လင်မယားကွာရှင်းတာ တရားဝင်ပါတယ်။ ကျွန်တော်တို့လူမှု့အသိုင်းအ၀ိုင်းမှာ ဤသာဓကတွေ အများကြီးပါ။ တရားရုံးမှာ လက်ထပ်၍ တရားဝင်လက်ထပ်ထိမ်းမြှားခြင်းဖြစ်သလို၊ တရားရုံးမှာကွာရှင်း၍လည်း ဥပဒေနဲ့ ညီလျှင် တရားဝင်ပါတယ်။ သို့သော်လည်း ဤဥပဒေအရဆိုတာတွေဟာ လူတွေရဲ့နှလုံးသားများ မာကြောခြင်းကြောင့်ဖြစ်ရသည်ဟု ခရစ်တော်သခင်က ထောက်ပြခဲ့ပါတယ်။

ခရစ်တော်သခင်၏ တရားတော်မှာတော့ ဘုရားသခင်၏မူလ စီမံကိန်းကိုထောက်ပြခဲ့ပါတယ်။ လူယောက်ျားနှင့် လူမိန်းမတို့ဟာ ဘုရားသခင်ဖန်ဆင်းကတည်းကပင် တစ်ဦးကိုတစ်ဦး ပြည့်စုံစေကြပြီး အပြန်အလှန်မှီခိုကြရင်း နှစ်ဦးသည်တစ်သားတည်းဖြစ်ရပါတယ်။ ထို့ကြောင့် တစ်ဦးနှင့်တစ်ဦး အပြန်အလှန်လေးစားဆက်ဆံ၍ သစ္စာရှိရှိဖြင့် တရားတော်နှင့်ညီသော အိမ်ထောင်စု၊ မိသားစု တစ်ခုကိုတည်ထောင်အစပျိုးရင်း လူ့အသိုင်းအ၀ိုင်းတစ်ခုလုံးထိ တိုးတက်စေရပါတယ်။ လူ့သားအသိုင်းအ၀ိုင်းတစ်ခုလုံး၏ အရင်းအမြစ်ဟာ ဤမိသားစုလေးက စတင်တာပါ။

ဤမိသားစုလေးတွေပျက်စီးခြင်းဟာ ၎င်းထက်ကြီးမားသည့် လူ့အသိုင်းအ၀ိုင်းပျက်စီးရာ လမ်းစဖြစ်နေပါလိမ့်မယ်။ ပျက်စီးနေတဲ့ မိသားစုမှ ပေါက်ဖွားလာသော ကလေးငယ်များဟာလည်း အနာဂတ်မှာ စိတ်ပိုင်းဆိုင်ရာ၊ လူမှု့ရေးဆိုင်ရာ၊ ၀ိညာဉ်ရေးဆိုင်ရာ ခြိုးတဲ့သည့် လူငယ်များဖြစ်လာစေပြီး ပတ်ဝန်းကျင်နှင့်အသိုင်းအ၀ိုင်းအား ဆုတ်ယုတ်စေပါတယ်။ ကျန်းမာပျော်ရွှင်တဲ့မိသားစုတစ်ခုဟာ အချင်းချင်းနားလည်ပေးတတ်သည့် မိဘနှစ်ပါး၊ အချင်းချင်း အပြန်အလှန်လေးစားဆက်ဆံတတ်သည့် မိဘနှစ်ပါး၊ အချင်းချင်း တစ်ဦးဟာတစ်ဦးအတွက် အသင့်ရှိနေတတ်သည့် မိဘနှစ်ပါး၊ အချင်းချင်းလက်ချင်းဆက်၍ ဆုတောင်းတတ်သည့် မိဘနှစ်ပါးတို့ပေါ်မှာ အများကြီးမူတည်ပါတယ်။ ဆုတောင်းခြင်းမှာ စည်းလုံးသည့်မိသားစုဟာ အမြဲအတူတကွစည်းလုံးနေပါတယ်။ တရားရှိသည့်မိသားစုမှာ ဘုရားရှိပါတယ်။ ဘုရားရှိသည့်မိသားစုမှာ မေတ္တာတရားတို့ရှိပါတယ်။ မေတ္တာတရားရှိသည့်မိသားစုမှာ ပြည့်စုံသည့်ဘ၀၊ ပျော်ရွှင်စရာကောင်းသည့်မိသားစုဘ၀တို့ ရှိနေပါတယ်။

ယနေ့ခေတ်ကာလမှာ ဟိုတရားရုံးက ဥပေဒေထုတ်လိုက်၊ ဒီတရားရုံးက ဥပဒေထုတ်လိုက်ဖြင့် ဥပေဒေနှင့်ညီစေသလိုလိုဖြစ်သော လက်ထပ်ထိမ်းမြှားခြင်းတွေ ကမ္ဘာအနှံ့ပေါ်ပေါက်နေပါတယ်။ သို့သော်လည်း ထိုအရာတွေကို ဥပဒေထက်မြင့်တက်၍ တရားလမ်းစဉ်ဖြင့် စဉ်းစားထောက်ရှု့ကြမည်ဆိုလျှင် ကျွန်တော်တို့ရဲ့နှလုံးသားတွေလည်း ဥပဒေတစ်ခု၏ အကန့်အသပ်ဖြင့်သာ ဖြောင့်မတ်မှန်ကန်ကြမည်မဟုတ်တော့ဘဲ တရားတော်အရ ဖြောင့်မတ်မှန်ကန်စေနိုင်ပြီး ပြည့်စုံခြင်းသို့ရောက်စေမှာဖြစ်ကြောင့် ယနေ့ဧ၀ံဂေလိတရားတော်အား ထောက်ရှု့ဝေငှလိုက်ပါတယ်။

ကိုရင် (ဒိုမီနီကန်)